Novas
Culturgal, seleccionado como un dos tres mellores proxectos de acción e promoción cultural do Estado
A Dirección Xeral de Industrias Culturais, Propiedade Intelectual e Cooperación, dependente do Ministerio de Cultura e dirixida por Adriana Moscoso, recoñece o vindeiro xoves 11 de novembro os tres proxectos seleccionados como os gañadores o pasado ano na liña de axuda á Acción e Promoción Cultural. Entre eles, atópase Culturgal, a Feira que desenvolve a súa décimo cuarta edición do 26 ao 28 de novembro de 2021 no Pazo da Cultura de Pontevedra. A capacitación no mundo da animación -investigación levada a cabo pola Federación Española de Asociaciones de Productoras de Animación-, e as Xornadas Internacionais de Patrimonio Industrial, celebradas en Xixón, comparten con Culturgal a escolla ministerial. O auditorio do Espacio Fundación Telefónica de Madrid acolle o día 11 unha xornada de presentación dos proxectos na que participarán en representación de Culturgal, o seu presidente Víctor López.
Tamén se presentan ese mesmo día os tres proxectos seleccionados na liña de “Modernización e innovación das Industrias Culturais e Creativas’: Music Live Stream, Exquare: Centro Expositivo Experimental M3, e Summer Camp. O acto estará conducido por Helena Díez Fuentes e nel intervirán a directora xeral da Fundación Telefónica, Carmen Morenés, e a directora xeral de Industrias Culturais, Propiedade Intelectual e Cooperación, Adriana Moscoso. De Culturgal, destacan desde o Ministerio de Cultura que “non é unha feira ao uso. A actividade profesional compleméntase cunha extensa programación cultural e o recinto de postos de venda e exposición convértese nun escaparate privilexiado no que a sociedade galega pode coñecer directamente as últimas novidades editoriais, musicais, escénicas,audiovisuais, deseño e arte contemporánea, etc”. O galardón recoñece o traballo realizado en 2020 para adaptar a programación de Culturgal á situación de crise sanitaria. A xornada do día 11 pode seguirse vía streaming na web espacio.fundaciontelefonica.com co hashtag #MejoresProyectosICC2020.
Culturgal celébrase en 2021 co lema “A cultura que toca” e está organizada pola asociación do mesmo nome da que forman parte Escena Galega, Agapi, Asociación Galega de Editoras, AGEM e Eganet. Conta co apoio da Xunta de Galicia a través de Agadic, do Concello de Pontevedra, da Deputación de Pontevedra, do Ministerio de Cultura e Deporte e da Deputación da Coruña. A organización ven de anunciar o peche da venda de espazo feiral tras esgotarse os stands dispoñibles e comezará a difundir a programación 2021 a partir desta mesma semana.
Programa #MejoresProyectosICC2020 11/11/2021 Dirección General de Industrias Culturales y Creativas, Espacio Fundación Telefónica, Madrid
10:00h: Presentación. Helena Díez-Fuentes. Camen Morenés Giles.Directora xeral de Fundación Telefónica.Adriana Moscoso. Directora xeral de Industrias Culturais, Propiedade Intelectual e Cooperación.
10:05h. Mellores proxectos das axudas para a modernización e innovación das industrias culturais e creativas mediante proxectos dixitais e tecnolóxicos 2020. Mesa redonda: Music Live Stream, Exquare: Centro Expositivo Experimental M3, e Summer Camp.
11h. Mellores proxectos das axudas para a acción e a promoción cultural 2020. Mesa redonda: Elaboración e difusión de estudio sobre a formación animación e VFX a nivel nacional e europeo; XXII Xornadas Internacionais de Patrimonio Industrial e Feira Culturgal 2020
12h. Networking
A cita con culturgal 2023
Culturgal, un evento único que se celebra anualmente reunindo ao sector cultural e aos seus públicos en Pontevedra. Este ano a Feira das Culturas Galegas terá lugar do 1 ao 3 de decembro no Pazo da Cultura, onde os públicos poderán achegarse ás as novidades editoriais, o último en audiovisual, novas propostas das artes escénicas, espectáculos de música ao vivo, servizos profesionais e outras iniciativas híbridas e vinculadas ao mundo da arte. Unha oferta de programación contemporánea e representativa da acción cultural no país con avances, estreas e actualidade, asi como un amplo punto de información e compra da produción cultural do ano.
Culturgal quere favorecer tamén o seu carácter como escenario de encontros entre profesionais e sectores, e de espazo para o nacemento e consolidación de proxectos. A Feira das Culturas Galegas busca reforzar os vínculos coas diferentes asociacións gremiais e promover a comunicación entre todos aqueles axentes e sectores que participan da actividade cultural.