Culturgal Expandido en Muros do 16 ao 18 de outubro

O Mercado Municipal de Muros acolle os próximos días 16, 17 e 18 de outubro (venres, sábado e domingo) a edición 2026 do Culturgal Expandido, coa colaboración da Deputación da Coruña e o Concello de Muros.

O programa inclúe actividades para todas as idades e a presenza de artistas e creadores locais, como o grupo Lisdexia e o escritor Samuel L. París, ademais de concertos, conversas literarias, programación infantil e baile tradicional.

“Este Culturgal Expandido quere unir a enerxía cultural galega coa enerxía cultural dunha vila como Muros cun obxectivo final, que non é outro que divertirse”, asegura Camilo Franco, director do Culturgal. Todo o programa é gratuíto.

Programa

O Culturgal Expandido comeza o venres 16 co autor, director teatral e narrador Candido Pazó (19:00 horas), para dar paso ao recital ‘Todos poetas menos o capitán’, de Samuel L. París, e un concerto poético de Silvia Pena e Jesús Andrade.

O sábado pola mañá, programación infantil con ‘O Lobo Feliz’, de Miguel Guido, e ‘Menú de Contos’, de Charo Pita.

Pola tarde, conversa literaria con Marga Tojo, Diego Ameixeiras e Carlos Lixó, concerto de Lisdexia (20:00 horas) e o espectáculo ‘Da vara e mais da besta’, de Lois Pérez e Secho.

O domingo chega a quenda do baile tradicional, cun obradoiro para todos os públicos co bailarín e coreógrafo Artur Puga, antes do fin de festa do ‘Ven e Baila’, cun chamamento a toda a veciñanza de Muros para bailar con Puga e Os Enxebres.